Damdawi-in 2-in NQAS an hmu thar

India rama sorkar damdawi-in ṭha bik tehna, National Quality Assurance Standards (NQAS)-ah Marpara Primary Health Centre leh Zemabawk Urban Primary Health Centre (UPHC) chu an tling thar.

NHM Mizoram mission director Dr Lily Chhakchhuak tarlan danin, NQAS-a tehnaah hian Zemabawk UPHC chuan 95.98% a hmu a, Marpara PHC chuan 91.97% a hmu thung. NQAS national certificate hmu tur hian 70% hmuh tlin a ngai a ni.

NQAS national certification hmu thar damdawi-in pahnih nen hian Mizorama sorkar damdawi-in 54-in NQAS national certificate an hmu tawh a; tunah hian sorkar damdawi-in 16 bakah, health & welness centre 23-in state certificate nei tawhin, national assessment an dil mek a ni.

NQAS tehnaah hian endikna chhawng thum paltlang a ngai a, endikna hnuhnung ber chu National External Assessment tih niin, state páwn aṭangin endiktu (assessor)-te'n an endik ṭhin. Damdawi-inah natna darh thei ven kawnga hmalak dan te, thawktute an hna bila an thiamna te, enkawlna an pek ṭhat dan te, a thlawna enkawlna leh damdawi pek te, damdawi-in faina leh bawlhhlawh sawngbawlte leh thil dang ṭhenkhatte endik ṭhin a ni.