Thla hnih chhungin ruihhlo vbc 13.28 man hu man a ni

Mizoram sorkar leh Central YMA ṭangho chuan September 1, 2025 aṭangin ruihhlo do beihpui an thlak a; beihpui thlak ṭan aṭanga thla hnih, September-October chhungin Mizoram Police leh khawtlang ṭangrualin ruihhlo cheng vbc 13.28 hû an man tawh.

Police hotute hnen aṭanga Vanglaini thu dawn danin, ruihhlo do beihpui thlak a nih hnuah khaw thlan bik 22-ah police an duty a, khawtlang hruaitute nen Myanmar lam aṭanga ruihhlo rawn lut tur an veng a ni. Ruihhlo venga duty-te chuan ruihhlo bakah kuhva rahte an man bawk.

Ruihhlo donaah khawtlang hruaitute an ṭangkai tak zet thu sawiin Police hotute chuan, "An ṭang hle a, theihtawp min chhuahpui. Anni min puihna hi kan hlâwkpui em em a, ruihhlo pawh tam tak kan man theih phah a ni," an ti.

Kumin September leh October chhunga Mizoram Police-in ruihhlo an mante chu - heroin kg 5.540, cheng vbc 1.86 hû; methamphetamine kg 77.314, cheng vbc 10.46 hû; alprozolam mûm 47,400, cheng nuai 9.48 hu leh, Corex ûm 8, Rs 23,200 hu te a ni a, a vaiin cheng vbc 13.28 hû a ni.