KHAWTHLIR

CM-in CJ a kawm

November 2, Pathianni khan chief minister Lalduhoma chuan Mizoram tlawha lo zin Gauhati High Court chief justice Ashutosh Kumar chu thingpui a inpui. CM hian Mizoram sorkarin judicial infrastructure lama hmasawnna a neihte a hrilh a; hmachhawp a neih te, Mizoram State Human Right Commission din chungchanga hmalak mek dante leh thil pawimawh dangte a sawipui bawk.

Postal ballot-in vote thlak a ni

Dampa bial MLA by-election atan nimin khan postal ballot hmanga vote thlak turte'n Returning Officer pisaah vote an thlak. Postal ballot hmanga vote thlakte hi form 12 hmanga vote thlak dilna, election duty tura ruat nihna appointment letter nena October 29, 2025-a dilna lutte an ni.

Certificate hmu thar

Champhai District Hospital chuan India rama sorkar damdawi-in, nau neihna hmun ṭha bik tehna, LaQshya leh naupang enkawlna hmun ṭha bik tehna, MusQan-ah an tling thar a, certificate a hmu. Champhai Hospital hian LaQshya-ah 93.96% hmuin, platinum badge an dawng a, MusQan-ah 96.57% an hmu bawk.

Hnathawh thlir let

Nimin khan Serchhip bawrhsap Paul L Khuma hoin Serchhip Kawlri-a Heritage Centre sak meka hnathawh tawh chin thlir let a ni. Bawrhsap chuan, Serchhip Kawlri-ah khawtlang tana ro tling din a ni dawn tih sawiin, hna thawktute chu a ṭha thei ang bera a hmunhmate buatsaih turin a chah.

Sum hman endik

Mamit DC office-ah nimin khan Dampa by-election expenditure observer Shyam Kumar hoin by-election atana candidate-te sum hman dan endik vawi hnihna neih a ni a; sum hman danah felhlel leh dik lo hmuh a ni lo. Nimin vek khan vote thlakna tur khawl (EVM & VVPAT)-te enfel a ni a, by-election atan hian polling station 41-a hman tur khawl 41 ruahman niin, reserved 41 a awm bawk.