LADC inthlan puan thuai a ni dawn - SEC
State election commissioner (SEC) Dr H Lalthlangliana chuan nimin khan Lawngtlai DC conference hall-ah thuthar thehdarhtu te, tlawmngai pawl te, kohhran hruaitute leh political party aiawhte a kâwm a; Lai Autonomous District Council (LADC) inthlan hun puan thuai a nih dawn thu a sawi.
Dr H Lalthlangliana chuan, Lawngtlai a tlawh chhan leh thuthar thehdarhtute a kawm chhan ber chu, LADC-a MDC inthlan awm tur chungchang a nih thu a sawi a, "Mipuite'n an duh zawng zalen taka an thlan hi thil pawimawh hmasa a ni a, chumi atan theihtawp chhuah a ni," a ti.
Inthlan ni puan thuai a nih dawn thu sawiin State Election Commissioner chuan, political party-te chu mipui zalenna tibuai khawpa che lo tur leh thu dik leh dâwt tel lo a inzuar turin a chah.
Dr H Lalthlangliana chuan, SEC aṭanga zawm tur thuchhuahte zâwm turin political party-te a ngen a, "NGO leh kohhran hruaitute inthlanna thianghlim leh zalen a awm theih nan a theihtawp chhuahpui turin ka ngen a ni," a ti.
SEC secretary VL Remliana pawhin thu sawiin, "LADC inthlanpui lo awm turah khauh taka dan kenkawh a ni dawn. Model Code of Conduct ṭha taka zâwm turin party-te kan chah a ni," a ti a; inthlanna felfai tak a awm theih nan NGO leh kohhrante chu ṭhahnemngai taka SEC thawhpui turin a sáwm.
Ṭhutkhawmah hian NGO, kohhran, thuthar thehdarhtute leh political party aiawh an tel kim a; inthlanna felfai leh thianghlim taka awm theih dan tur te, inthlannaa hriat tur pawimawhte leh hmalakho dan turte an sawiho a ni.
SEC Dr H Lalthlangliana hian nimin vek khan Lawngtlai district chhunga election official-te a kawm a, inthlanna felfai, thianghlim leh hlawhtling tak nei turin election official-te an pawimawh thu a sawi.
Mipuiten zalen taka an duh zawng an thlanchhuah theih tura theihtawp chhuah tura fuihin Dr H Lalthlangliana chuan, "Inthlanna tura hmalak tawhna chinah inbuatsaihna a ṭha hle," a ti a, an mawhphurhna ṭha taka hlen turin a chah.
Lawngtlai election officer Collin Hlychho chuan inthlanna felfai tak nei tura hmalakna hrang hrangte a tarlang a, Lawngtlai SP PC Lalchunglura chuan dan leh thupek kenkawh kawngah hmalakna kawng hrang hrangte a tarlang bawk.