Gauhati High Court Chief Justice-in LSA tan multi utility vehicle a vailiam

Gauhati High Court chief justice Justice Ashutosh Kumar chuan nimin khan Gauhati High Court, Aizawl Bench tualah Mizoram State Legal Services Authority leh district Legal Services Authority-te tan multi utility vehicle a vailiam.

Justice Ashutosh Kumar chuan, Legal Service programme hrang hrang neihna atana multi utility vehicle thar neih a ni chu lawmawm a tih thu a sawi a; lirthei chu mipui mimir a tam thei ang berin an dikna chanvote mahni kawtkai ngeia an hmuh theih nan leh an hamṭhatna an hmuh zel theihna atan ṭangkai taka hmang ngei turin Legal Services Authority-te a chah.

Lirthei vailiamnaah hian Gauhati High Court judge pahnih - Justice Michael Zothankhuma leh Justice Nelson Sailo te pawh an tel. Justice Nelson Sailo chuan, multi utility vehicle Legal Services Authority-te'n Mizoram khaw hrang hranga awareness programme neihna atan te, outreach neihna atan leh mobile lok adalat neihna atante hman a nih dawn thu a sawi.

Kum 2020-2025 chhungin Mizoram SLSA leh district LSA-te chuan hmun 960-ah legal awareness an buatsaih a, chungah chuan mi 3,97,484-in an chhim. Outreach programme vawi 764 neiin, mi 85,161-in an hmang ṭangkai a; mobile lok adalat vawi kua neihah mi 711-in hamṭhatna an hmu bawk.