Empowered Committee on Investment ṭhu

Chief minister Lalduhoma kaihhruaiin nimin khan CMO conference hall-ah Empowered Committee on Investment an ṭhukhawm a; meeting hmasaa an rel tawhte bawhzui dan leh hmalak zel dan turte an thlirho.

Ṭhutkhawmah hian Planning department-in a duan Mizoramin full fledged investment promotion agency a neih ve dan tur enho a ni a; state dangte kalpui dan en chunga duan a nih angin siam rem ngaite a la awm theia ngaih a ni. Mizoram Special Investment Zone hmunhma tur thlithlai mek dan report ngaihthlak a ni a, a rang lama chinfel ni se, an ti.

Mizorama thlai thar sawngbawlna din duha diltu company, Empowered Committee on Investment-in a lo pawm tawh leh inremna (MoU) a lo ziahpui tawhte kal zel dan sawiho a ni a; company ṭhenkhatin hma an lak zui nghal avangin MoU leh Mizoram Industrial & Investment Policy 2025 anga sorkarin an mamawh a lo pek ve tur - kawlphetha, tui, a hungna (fencing), a panna kawng (approach road) leh land development-te tihhlawhtlin dan sawiho a ni.