Lungleiah Bána Kaih hmalakna thlirho

Bána Kaih (Handholding) scheme hnuaia Lunglei district-a hmasawnna tura thawhpui atana thlan (progress partner)-te hmalak dan vil zui tura din Lunglei District Monitoring Committee for Bána Kaih chu an chairman Navneet Mann, district bawrhsap hoin nimin khan an ṭhu a; hmalak tawh dan leh hmalak zel dan turte an sawiho.

Tarlan danin, Bána Kaih phase I-ah khan Lunglei district-ah CM's Special Package dawng tura thlan mi 359 hnenah July 2025 khan ṭanpuina pek a ni a, progress partner-te hian hma an la mek.

CM's Special Package hnuaia progress partner-te chu Commerce & Industries hnuaiah 128, Horticulture-ah 78, Animal Husbandry & Veterinary-ah 77, Fisheries-ah 45, Agriculture & Farmers Welfare-ah 14, Land Resources, Soil & Water Conservation-ah 13, Tourism leh Sericulture hnuaiah mi pahnih ve ve an ni. Progress partner-te hmalak dante department hotute'n a hmunah an enfiah vek tawh a, report an thehlut tawh bawk.

Bána Kaih phase I-ah khan loan diltu zingah progress partner atana thlan mi 50 an awm a, loan pek chhuah mek zel a ni. Loan component-ah hian Commerce & Industries department-in progress partner mi 17, Horticulture-ah mi 14, AH&Vety-ah mi pasarih, Sericulture-ah mi panga, Agriculture, LRSWC leh UDPA-ah mi pahnih ṭheuh leh, Fisheries-ah mi pakhat an ni.