Phawngpui National Park tlawh theih

Chhimtuipui Wildlife Division deputy conservator of forest (DCF) Thanliana Hauhnar chuan thuchhuah siamin, Phawngpui National Park chu November 1, 2025 aṭangin mipui tlawh theiha hawn a nih thu a tarlang. Park chhungah phalna bik nei lo tan ni chhuah aṭanga ni tlak thleng bak awm phal a ni lo.

Thanliana Huahnar chuan, Phawngpui National Park chu nungchate inthlah pun hun lai, kumin May 1 aṭanga October 30 chhung khar a nih thu leh, November 1, 2025 aṭangin mipui tlawh theiha hawn a nih leh thu a tarlang a, "Park tlawh tumte tan luh phalna (entry permit) nei hmasa loin luh phal a ni lo a, permit hi Thaltlanga Reception Counter-ah luh man pein lak theih a ni. Ṭul bik thilah chuan DCF leh bialtu RO hnenah phone call hmangin special permit dil theih a ni ang," a ti.

Department hotute aṭanga phalna nei lo tan Forest Restaurant House, Fárpak-ah riah leh choka hman theih a nih loh thu te, Park chhungah phalna bik nei lo tan ni chhuah aṭanga ni tlak thleng bak awm phal a nih loh thu te, Park luh chhohnaah lirthei tlan theih a nih rih loh thute a tarlang bawk.