KHAWTHLIR

KṬP-in thisen pe

KṬP, Bethlehem Venglai North Branch chuan an branch kum 15 tlin pualin nimin khan thisen pek an huaihawt a, Civil Hospital, Aizawl tan thisen unit 24 an pe a, petute mipa 22 leh hmeichhia pahnih an ni.

Ch Chhunga Fund

Mizoram University (MZU) English and Culture Studies department-a kumin 2025-a pakhatna C Zamawia hnenah nimin khan Lawrence Ch Chhunga Memorial Endowment Fund, 2025 hlan a ni. Endowment Fund hi MZU-a thawk ṭhin Prof. Margaret Ch Zama’n a pa, Lawrence Ch Chhunga, Mizoram chief minister hmasa ber hriatreng nan MZU MA English and Culture Studies department-a pakhatna hnenah [ek ṭhin a ni a; kuminah hian Rs 43,331 leh thuchei hlan a ni.

MLA-in enfiah

Aizawl East-II bialtu MLA B Lalchhanzova, minister of state chuan nimin zing khan a bial chhung Chite Veng leh Armed Veng South tana Horiticulture Centre, Chite Venga ram chhunga divert road siam a nih theih dan tur an enfiah. MLA hi bialtu corporator Christina Roluahpuii Sailo leh veng pahnih khawthlang hruaitute'n an ṭawiawm a ni.

Sava leh ramsa kah leh man khap

Serchhip district magistrate Paul L Khuma chuan thupek chhuahin, Serchhip district-ah silai leh hmanraw dang hmanga sava leh ramsa kah/man khap a nih thu a puang. Thupek zâwm lote chu BNS 2023 Section 223 hmanga hrem theih an nih thu a tarlang bawk.

Ruihhlo do thlirho

Lawngtlai district bawrhsap Donny Lalruatsanga kaihhruaiin nimin khan sorkar hotute leh tlawmngai pawl hruaituten ruihhlo do beihpui thlakna chi hnih - NCORD leh Operation Jericho kalpui dan an thlirho. NCORD leh Operation Jericho hnuaia hmachhawp leh mamawhte sawiho a ni a; ruihhlo donaah sorkar, NGO, kohhran leh mipuite ṭanho zel ni se, an ti.