Krismas puala kâwn chei mawite tan AMC-in lawmman a siam dawn

Aizawl Municipal Corporation (AMC) chuan kumin Krismas puala kâwn cheiah lawmman an siam dawn a, pakhatnain Rs 2,00,000 an dawng dawn.

AMC chuan nimin khan hriattirna chhuahin, kumin Krismas puala kâwn cheiah lawmman siam a nih dawn thu an puang a ni. An ruahman dan chuan, kâwn chei mawi berin lawmmanah Rs 2,00,000 an dawng dawn a, pahnihnain Rs 1,50,000 leh pathumnain Rs 1,00,000 an dawng ang a, top 3-a lang pha lo, chei mawi zual pasarih hnen­ah consolation prize Rs 50,000 hlan a ni bawk ang.

Aizawla kâwn cheite chu kumin December thla tir lamah endik a ni dawn tih tarlangin AMC chuan, "Endik laia din­hmun azirin a ti ṭha thlan a ni ang. Kâwn chei turte chu November 2025 chhunga chei hman tawh tura beisei an ni," an ti.

HRIAT TUR DANGTE
* 'Kâwn' tih hian kâwn, kawngpui dung leh hmun remchang dangte, Krismas leh kumthar puala cheite a huam.
* Lawmman hi a cheitu (entirna - local council/NGO/pawl) hminga pek a ni ang.
* LC pakhat huam chhungah hmun khat aia tam chei a nih chuan hmun khat anga ngaih a ni ang.