Rooftop solar kalpui ṭhat vangin Mizoramin lawmman a dawng

Ministry of New and Renewable Energy (MNRE)-in India rama nizung chakna hmanga kawlphetha tihpun kawnga hmalakna, PM Surya Ghar: Muft Bijli Yojana (Rooftop solar) a kalpui mekah, Mizoram chuan Top Performing North East State lawmman a dawng.

Lawmman hi October 31, 2025 khan Regional Workshop on Renewable Energy-North East Zone, Guwahati-a neihah MNRE minister Pralhad Joshi hnen aṭangin Mizoram Power & Electricity department hotute an dawng a ni.

November 3, Thawhṭanni khan lawmman dawn lawmna leh nasa zawka hmalak zui dan tur rêlin Power & Electricty minister F Rodingliana hoin a pisaah department hotute an ṭhukhawm nghal.

F Rodingliana chuan, lawmman dawng thei tura thawktu department officer-te leh rooftop solar installation titu (vendor)-te chungah a lawm thu a sawi a, "Mizoramin kawlphetha a intodelh tura hma a lak mekah, hydel project lama hmalakna piah lamah solar hmanga power thar chhuah tihpun zel a pawimawh," a ti a, beihpui thlak zel turin official-te a chah.

Ṭhutkhawmah hian rooftop solar hmanga kawlphetha thar tihpun zel nan district headquarters leh thingtlang khaw hrang hranga nasa zawka hmalak dan tur rel a ni.

Mizorama PM Surya Ghar: Muft Bijli Yojana scheme hnuaia mimal ina rooftop solar vuah kalpui mekah hian central subsidy 60% pek a ni a, hei bakah hian Mizoram sorkarin 20-25% subsidy a pek belh thei bawk.