Hna 2,619 hnawhkhah phalna pe tawh, Sorkar hna thar 515 siam a ni tawh - CM

Chief minister Lalduhoma chuan, ZPM sorkar tirh aṭanga August 2025 thlengin sorkar hna thar 515 siam a nih tawh thu leh hna ruak 2,619 hnawhkhah phalna an pek tawh thu a sawi.

CM Lalduhoma hian nimin khan Mara Students Organisation (MSO)-in Siaha College seminar hall-a diamond jubilee an lawm a hmanpuinaah thu sawiin, zirlaite leh ṭhalaite tan sorkarin nasa taka hma a lak thu a sawi a, "Kan sorkar tirh aṭanga kumin August thleng khan sorkar hna thar 515 kan siam tawh a, hna ruak hnawhkhah phalna direct recruitment aṭangin 2,087 leh limited departmental exam kaltlangin 532 kan pe tawh," a ti.

Mizo ṭhalai, sorkar hnathawh tum lote tan Bána Kaih scheme hmangin thiamna leh theihna zâwna eizawnna bul ṭan theihna tur an duang thu sawiin CM chuan, "A thawh hnihna kalpui turin kan inbuatsaih chho mek... Kan ramin hmasawnna a hmu chho zel a, hmachhawp tam tak kan nei bawk," a ti a; hmasawnna tharte chhawr ṭangkaitu ni tura inbuatsaih turin ṭhalaite a chah.

Chief Minister chuan, tun hnaia zir chiangtu pakhatin Mizoram chu India rama eirukna lem lamah pahnihna a nih thu an sawi tih tarlanfin, "A chhinchhiah tlak hle. Corruption leh rûkrûkna lam rêng rêng min dopui turin kan ṭhalaite ka sáwm che u. Eiruk sum aṭanga lei thil rêng rêng hi chu duh lo ngam ila, kan nu leh pate'n an eirûk aṭanga an lei a nih chuan eng anga thil ṭha pawh ni se i hnâwl ngam ang u," a ti.

Lalduhoma chuan, ruihhlo hmuh a awlsam a nih pawhin hnar zel turin ṭhalaite a chah a, "Mi tam takin an ti chhin a, a bâwihah an táng zui thuai a, an engkim a chhuhsak ṭhin," a ti a; Mizoram chu India rama ziak leh chhiar thiam vekna state hmasa ber a nih thu leh khualzin hîp luh lamah India hmarchhaka hmasawn nasa ber a nih thu a sawi.

Mara leh Lai hnamte'n autonomous district council an nei chu a hlut thu sawiin Lalduhoma chuan, ADC chu an zia, ṭawng leh tih dan venhimna leh hmasawnna tluantling neihna atan hmang ngei turin a chah a; MSO chu Mara ṭhalaite kaihruaitu leh hnam hui khawmtu a nih thu sawiin, "Zo hnahthlak unau dangte nena inpawhna ṭha kengkawhtu a ni a, zirna lamah Mara ṭhalaite tan an thawh hlâwk hle ṭhin," a ti.

CM Lalduhoma hian MSO office-ah golden jubilee lungphun leh jubilee hall a hawng a; kumin kum kal mekah New Laty leh Lopu-ah cheng nuai 145 man ve ve secondary school building sak a nih thu te, Theiri-ah nuai 111 man higher secondary school building sak a nih thu te, Tipa V-ah nuai 188 man hmeichhe hostel sak a nih thute a sawi bawk.

Jubilee lawmna inkhawm MSO vice president T John Tennyson-a'n a kaihruai a; khualzahawm M Laikaw, MADC chief executive member chuan MSO chu lawmpuina leh duhsakna a hlan. MSO president Elson Eliasah Notlia pawhin thu a sawi.

MSO hi November 4, 1965 khan Shillong-ah din a ni.