Kut hnathawktute hmasawn dan tur sawiho

Rural Development depart-ment, Bharat Rural Livelihoods Foundation (BRLF), United Nations Development Program-me leh Mizoram University te chuan nimin khan ATI Auditorium-ah 'Roundtable Consultation on Enabling Sustainable Livelihoods in Mizoram' an buatsaih a, RD minister Prof. Lalnilawma'n a hmanpui.

Inráwnkhawmnaah hian ram leilung tichhe lo zawnga hmasawnna tluantling kalpui dan tur leh thingtlang mite hmasawnna tur chungchangte sawiho a ni.

Tarlan danin, tun dinhmunah Mizorama cheng zawng zawng zinga 60-65% vel chu lo neia eizawng an ni a, loneitute thil thar chhuahin India ram dang a la pha lo hle. Chawhrualin India ramah hactare khatah loneitute’n ton 2.5 leh 3 inkar an thar laiin, Mizoramah chuan ton 1.73 chauh loneitute’n an thar. Loneitute thar chhuah - forestry leh fisheries belhkhawm chu state gross value-added-ah 27% a ni a, service sector-ah 46% a ni thung.

Prof. Lalnilawma chuan, eizawnna tluantling, tlo leh kumhlun a awm theih nan sorkar, mimal, pawl leh khawtlang an ṭanrual a pawimawh thu a sawi a, "Ruahmanna siamtute'n thingtlang mite leh kut hnathawktute hi sorkar scheme chhawrtu (beneficiary) anga thlir satliah mai loin, hna thawhpuite (partner) an ni tih hriat reng a ṭul. Thingtlang lama mite leh kut hnathawktute thawhpuina tel lo chuan tunlai thiamna, degree sang tak takte leh technology ṭha tak takte hian awmzia tak tak a nei lo," a ti.

Adviser to CM (Handholding) Dr KC Lalmalsawmzuava pawhin Mizoram dinhmun leh sorkar hmalakna hrang hrangte a tarlang a; BRLF chief executive officer Kuldip Singh-a'n an hnathawh leh thil tum tlangpuite a sawi bawk.

BRLF hi Ministry of RD hnuaia awm niin, India ram state 11-ah hna an thawk mek a; thingtlang mite leh tribal mite’n sorkar laipui hmalakna hrang hrang zar an zo ve theih nan an thawk ṭhin. BRLF leh Rural Development department-te hian kum thum chhung rural livelihood sector-a thawkho turin May 2025 khan inremna an ziak tawh a ni.