TA lakna tura inbuatsaihna thlirho

State Level Committee on Territorial Army Coor-dination and Establish-ment chu nimin khan an chairman Lt Col. Clement Lalhmingthanga, MLA hoin Rajiv Gandhi Stadium VIP lounge-ah an ṭhukhawm a; RG Stadium-a Mizo Territorial Army (MTA) lak rûnpui (recruitment rally) neih tura inpuahchahna leh hmalak dante an thlirho.

Lt Col. Clement Lal-hmingthanga chuan, Mizoram leh Mizo ṭhalaite tana MTA recruitment rally hlutzia hria a, an awmna khua leh venga ṭhalaite recruitment rally-a tel tura fuih turin member-te a sáwm a, "General duty personnel-ah 144 lai lak a ni dawn bakah hmeichhe tan seat 9 reserve a ni dawn. A dil thei chin pawh kum 18-42 inkar lai a nih avangin a huam zau hle a ni," a ti.

Territorial Army-te hlawh a ṭhat thu sawiin Lt Col. Lalhmingthanga chuan, "Mahni state-a awm reng siin, hard posting (hardship) allowance Rs 9,000 vel an dawng dawn a, 8th Pay an hman hunah phei chuan hlawh sang tak an la dawn. Hetianga Mizoram leh kan ṭhalaite tan malsawmna kawng inhawng tur, recruitment rally-a mawhphurhna chanvo kan neihte hi ngai pawimawh ang u," tiin member-te a sáwm.

MTA recruitment rally Mizoram sorkar leh 166 INF BN (TA) (H&H), Assam ten an buatsaih tur a ni a; ṭha tak leh tluang taka neih a nih theih nan Mizoram sorkara department hrang hrangte bakah, tlawmngai pawl leh local council ṭhenkhatte hnenah mawhphurhna hrang hrang pek a ni.