Operation Jericho sawiho a ni

Nimin khan Lawngtlai bawrhsap Donny Lalruatsanga kaihhruaiin, sorkarin ruihhlo beihpui a thlakna 'Operation Jericho' hnuaia hmalak meknate sawiho a ni.

Donny Lalruatsanga chuan ruihhlo tihremna turin sorkarin 'Operation Jericho ' chak takin a kalpui mek tih sawiin, "Ram leh hnam hmelma lian ber ruihhlo do turin sorkar chauh a tawk lo. Ṭanho leh beihpui thlak ngai tak a nih angin, NGO, Kohhran, VC leh mipuiten theihtawp chhuah a thawhho a pawimawh tak zet," a ti.

Tun aṭang a theihtawp chhuah a nih loh chuan hmabak a thim dawn hle tih sawiin Lawngtlai Bawrhsap chuan, khawtlang nuam leh chhenfakawm zawk siam turte, tu leh fate tana ram nuam zawk siam tur leh chhungkaw nuam zawk siam tura theihtawp chhuah turin kalkhawmte leh Lawngtlai mipuite a sawm nghal.

Lawngtlai SP PC Lalchunglura chuan NCORD ṭhutkhawm hmasaa rel tawh bawhzui dan tlangpui - check gate siam leh duty te, awareness campaign, drug license holder-te endik leh raltlanten an hman ṭhin 125 - two wheelerendikte chu kalpui mek a nih thu a tarlang.

Thutkhawmah hian NCORD leh Operation Jericho hnuaia hmalakna awm tawhte leh hmalak chhunzawm dan turte thlirho a ni. NCORD hnuaiah ruihhlo do kawngah police, excise leh CYLA-ten a hmun ngeiah kalin, ngawrh zawkin endik thin ni se, an ti.

VC-te pawhin mahni veng chhungah theuh zu leh damdawi zuar awmlo turin chak zawkin hma lo la se an ti a, 125 two wheeler chu ruihhlo phurh nan a hluar hle niin an hria a, khauh tak a endik ṭhin an rel. A ṭul anga bawhzui turin DTO kutah an dah.