Leitlangpui Music Festival neih tur thlirho

Nimin khan Leitlangpui Music Festival (LMF) 2025 Working Committee chu an chairman, Lunglei bawrhsap Navneet Mann hoin DC conference hall-ah an ṭhukhawm a, inbuatsaihna hrang hrang an thlirho.

Leitlangpui Music Festival 2025 hi November 13-15, 2025 chhungin Pukpui Kawmzawlah buatsaih tura ruahman a ni. Zai, lam, hnam thil leh kut themthiam thil phochhuahna, thuam leh ei leh in chi hrang hrang zawrhna leh intihhlimna chi hrang hrangte buatsaih leh tura ruahman a ni.

LMF buatsaih turah hian PWD lam chuan a panna kawng leh a hmunhma siam rem hna thawk mekin, PE leh PHE department lamin eng leh tui hnianghnar taka pek a nih theih nan hma an la.

A panna kawng leh a hmunhmaa lirthei leh mihring chet vel dan leh ven himna atan district police-te'n ruahmanna siamin, lirthei hunna tur bik hrang hrang an ruahman fel tawh bakah, kawng dunga duty turin beat post 20 an ruahman.

DC office leh LMC bakah, department leh tlawmngai pawl hrang hrangte'n kut inbuatsaihna hrang hrang kalpui mek bawkin, kut huna medical duty ruahmanna te, magistrate leh disaster quick response team (QRT) duty tur ruahmanna te, DRDO, DUDO leh C&I hnuaia SHG leh entrepreneur-te leh ODOP stall ruahmanna te, DLSA leh police-te'n Legal Awareness Campaign an kalpuina tur ruahmannate sawiho a ni.

Leitlangpui Music Festival hawnna November 13 tlai dar 3-ah Health minister Lalrinpuii hoa hman tura ruahman a ni. Kut chhung hian a hmunah hian ZOHANDCO Exhibition kalpui pah tum a ni bawk.

Kut ni hnih ni, November ni 14-ah Leitlangpui Music Festival puala Leitlangpui Band Contest 2025 top 10 chin inelna leh final buatsaih a ni dawn. Top 3 chin hi December ni 12 - 20 chhunga Aizawla Winter Festival buatsaih turah an inlan nghal ang.

LMF 2025 hi ni thum chhung hian ni tin chawhnu dar 1 aṭanga zan dar 9/10 vel thleng hawn niin, item hrang hrang kalpui ṭhin a ni dawn.