Champhai district-ah Myanmar raltlan mi 13,662 an awm mek

Champhai district bawrhsap Mohammad Aaquib hoin nimin khan DC conference hall-ah sorkar hotu te, khawtlang leh pawl hruaitute'n raltlan buaipui dan tur leh ṭanpuina pek dan tur an sawiho. Nimin dinhmun angin Champhai district-ah Myanmar raltlan mi 13,662 an awm mek thu an tarlang.

Bawrhsap chuan, raltlan buaipui kawnga pawl hrang hrang hnathawhte fakawm a tih thu sawiin, "In hmalakna thawhpui turin sorkar a inhuam reng a, hemi kawngah hian inhawng takin indawr tawn zel a ṭha," a ti a, an hmalak zelna turah duhsakna a hlan.

Ṭhutkhawmah hian Adventist Development and Relief Agency, India project manager Sujan Chandra Das chuan an hmalaknate a tarlang a; Doctors Without Borders aiawhte'n ramri leh a ṭulna hmun hrang hrangah raltlan an enkawl dan an sawifiah. Zoram Entu Pawl, Humanity and Inclusion leh Jesuit Refugee Service ten an hnathawh dante an tarlang bawk.

Nimin dinhmun angin Champhai district-ah hian Myanmar raltlan mi 13,662 an awm a, mipa 4,256, hmeichhia 4,328 leh kum 18 hnuai lam 5,078 an ni.