Union cabinet-in CAB a pawm Parliament-ah pharh a ni dawn

Citizenship (Amendment) Bill chu nimin zing khan union cabinet chuan a pawm a; CAB hi kar leh hian Parliament-ah pharh a ni ang. 

Pakistan, Bangladesh leh Afghanistan aṭanga India rama rawn pem lut, Muslim sakhua ni lo sakhaw dang paruk zuitute hnena India khua leh tui nihna pek theihna, CAB chungchang hi prime minister Narendra Modi kaihhruai cabinet meeting-ah nimin zing khan ngaihtuah a ni a, pawm a nih thu Information and Broadcasting minister Prakash Javadekhar chuan nimin khan a puang.

Citizenship Amendment Bill (CAB) hmang hian  Pakistan, Afghanistan leh Bangladesh aṭanga rawn pem lut, Muslim huam tel loin  Hindu, Kristian, Sikh, Jain, Buddhist leh Parsi sakhua zuitute chu India khua leh tui, citizenship pek theih an ni dawn a ni. 

Eptu party - Congress, Trinamool Congress, DMK, Samajwadi Party, Left leh Rashtriya Janata Dal te chuan sakhaw behchhana khua leh tui nihna pek chu India ram danpui kalh a ni tiin, CAB hi an dodal. Hmarchhak state hrang hrangte pawhin hmarchhak leilung fate chimralna tur nia ngaiin he bill hi an dodal nasa hle a, kawng hrang hrangin duh lohna an lantir reng bawk.

CAB hi Parliament-ah pharh a nih chuan, BJP  in majority a neihna Lok Sabha-ah chuan awlsam taka a tlang nghal rin a ni a; nimahsela Rajya Sabha-ah erawh chuan BJP kaihhruai National Democratic Alliance (NDA) hian majority a la neih loh avangin a harsat deuh rin a ni thung.

BJP kaihhruai NDA sorkar hmasaah CAB hi pharh a ni tawh a, Lok Sabha-ah a tlang hnuah, Rajya Sabha-ah pharh hman loin a liam. Mahse kumin Lok Sabha inthlanpui neih dawnah BJP chuan CAB hi pharh ṭhat leha kal tlangpui ngei hi an thutiam zingah a telh a ni. 

Parliament-ah CAB 

Defence minister Rajnath Singh chuan Thawhlehnia BJP MP-te nena meeting an neihnaah, CAB hi Lok Sabha-ah pharh thuai a nih tur thu a lo sawi tawh. Nimina cabinet-in a pawm leh tak avangin kar leh chhung ngeiin House-ah hian pharh rin a ni. 

Rajnath Singh chuan sorkar laipuiin Jammu and Kashmir special status pekna, Article 370 titawp tura hma a lakna ang bawkin, CAB pharh tur chu an dah pawimawh tih an party MP-te bulah hian a sawi. Home minister Amit Shah-a'n Parliament-a bill a pharh hunah pawh BJP MP te chu rorel inkhawmah tel vek tura hrilh an ni.

Tun hnaiah Home minister Amit Shah chuan hmarchhak state-a political party hrang hrang hruaitute leh tlawmngai pawl hruaitute chu New Delhi-ah koin CAB chungchang hi a sawipui a; nimahsela hmarchhaka pawl hrang hrangte chuan CAB an duh loh thu hi an sawi hlawm.

Hmarchhak zirlai intelkhawm North East Students' Organisation (NESO) chuan CAB chu hmar chhak tana him lo a ni tiin a tawp thlenga do an tum thu an puang a, sorkar laipui chu CAB kaltlangtir tumna titawp turin an ngen bawk a ni.