MZP-in CAB dodal zel an tum

MZP chuan thuchhuah siamin, Citizenship Amendment Bill (CAB) chu Mizoram leh hnam tana him lo a nih avangin dodal zel an tum thu an tarlang.

MZP chuan, CAB chu pawl pakhat emaw, political party malin do hneh mai theih a ni lo tih tarlangin, party anga thangṭhat lâk tumna emaw, party inchirhtheh nan hman emaw ni lo se an duh thu an sawi a, "Political party leh NGO hrang hrang leh Mizo mipuite'n kan theihna zâwnah ṭheuh CAB hi na takin kan dodal a ni tih inpawm tlang turin Mizo zawng zawng kan ngen a ni," an ti.

CAB chu Parliament-ah pass tumin December 9, 2019-ah Lok Sabha-ah leh December 10-ah Rajya Sabha-ah pharh a ni dawn tih sawiin MZP chuan, "A pawi kan ti hle. North East Students’ Organisation (NESO) huaihawtin December 6, Zirtawpni hian CAB dodalna kawnga hmalak zel dan tur Guwahati-ah ngaihtuah a ni dawn," an ti a; meeting-ah chuan MZP hruaitute pawh an tel dawn thu an sawi.