2020 Synod moderator tur Rev.Dr C Lalhlira
Synod Inkhawmpui vawi 96-na, Mission Veng Kohhran biak-ina neih mekah nimin khan rorel ṭan a ni a, kum 2020 Synod-a moderator turin Rev. Dr C Lalhlira an thlang a, a hmun tur chu Dawrpui Kohhran biak-in niin, Dawrpui Bialte'n an thleng ang.
Nimina Synod rorel inkhawm ṭan a nih hnuah moderator kal chhuak Rev. R Lalhmingthanga'n moderator thar Rev. R Lalchangliana hnenah puithiam kawr hâktirin mawhphurhna a hlàn a, moderator thar kaihhruaiin rorel a ni. Kum 2020 Synod moderator atan Mission Veng pastor ni mek Rev. Dr C Lalhlira an thlang a, puipa tur dangte pawh an thlang nghal.
Pastoral Committee-in pastor nemngheh tura an rawt mi 12 (Pastoral hnuai)-te leh probationary pastor atana an lak mi 16-te chu inkhawmpui chuan a pawm a, Pathianni-ah nemngheh an ni ang. Pro. pastor atana lâk tharte chu Pastoral hnuaia awm tur mi 10 leh Mission Board leh Manipur area-a awm tur mi paruk an ni.
Inkhawmpui hian kum 2023-a Synod Inkhawmpui vawi 100-na nghahna atan Mission Veng biak-in an thlang. Synod Inkhawmpui hmasa lamah kum 2022 thlenga Synod thleng tur an lo thlang lâwk tawh a, chu'ngte chu - kum 2020-ah Dawrpui bial (Dawrpui biak-in), kum 2021-ah Republic Veng bial (Republic Veng biak-in) leh kum 2022-ah Khatla bial (Khatla biak-in) te a ni.
Synod Inkhawmpuiah hian Thawhlehni zan khan moderator Rev. R Lalhmingthanga'n report a pe. Moderator report-a a lan danin, Mizoram Synod hnuaiah presbytery 51, pastor bial 307, tualchhung kohhran 1,137, branch church 97 leh preaching station 708 a awm a; minister/pastor bial vawng 305 leh bial vawng lo 112 awmin, Masihi Sangati pastor pasarih nen minister zawng zawng 585 an ni. Pro. pastor 48 an awm a, kohhran upa 5,383 leh pem upa 332 awmin, an vaiin 5,715 an ni.
Kohhran mi zawng zawng 6,12,622 niin, chu'ng zinga 4,30,939 chu dan zawh kim an ni. Nau piang 8,581 an neih laiin, mitthi 3,745 an nei bawk.
Synod 2020 puipa turte
Moderator : Rev. Dr C Lalhlira
Secretary (Senior) : Rev. Vanlalrova Khiangte
Secretary (Junior) : Upa Lalrinmuana
Finance Officer : Rev. B Sangthanga
Rev. Lalramliana Pachuau
Statistician : Rev. J Lalremsiama
Executive Secretary : Rev. Lianhmingthanga Sailo (Sr.)
Rev. K Lalrinmawia