Police-in heroin kg 7.422 mannaa a bul tumtu ber nia hriat an man

Zokhawthar police-te chuan July 10, 2025 khan heroin kg 7.422, cheng vbc 2.22 hûa chhût an man a, hemi ṭuma heroin tawlhruknaa a bul tumtu ber nia hriat Lalchhuanthangi (50), Khatla South, Delhi-a awm mek chu November 4, Thawhlehni tlai khan an man.

Lalchhuanthangi hi Zokhawthar police-te chuan Special Bureau leh Delhi Police puihnain Delhi-ah an man a, a lakah thubuai an ziak lut nghal. Heroin kg 7.422 an man ṭum hian a kaihhnawihah mi pali an man tawh a, chu'ng mite chu a bul tumtu tak tak nia an hriat loh avanga chhui zui zelin, Lalchhuanthangi hi an man ta a ni.

Heroin kg 7.422 hi July 10, 2025 zan dar 8 vel khan Zokhawthar police-ten Kudamsen kai, Zokhawthara satha ip chhungah an hmu a, a hnu lawkah Lalnuntluanga (20) s/o Lalpekliana, Khawmawi, Myanmar chuan lak a tum a, police-te'n an lo man a ni.

Lalnuntluanga hi thu an zawhfiah hnuah Lalhriatliana (28) s/o Malsawma, Tahan C, Myanmar leh Chunglianawia (37) s/o Funglinga (L), Khamphat, Myanmar, Zokhawthar cheng mek ve ve bakah, Ṭialvangi (44), Zokhawthar an man leh bawk.