RG Stadium floodlight hawn a ni

Rajiv Gandhi Stadium-a êng (floodlight) siam thar chu November 3, Thawhlehni zan khan Sports & Youth Services (SYS) minister Robert Romawia Royte-in a hawng. Hawn zawhah Mizo­ram Premier League semi final khelh nghal a ni.

Robert Romawia Royte chuan, RG Stadium-ah zana inkhelh theih a ni ta chu lawmawm a tih thu sawiin, Mizo ṭhalaite tualchaina turin Mizorama khelmual hrang hrang 13-ah phûl lem phah turin sum sanction tihfel vek a nih tawh thu a sawi.

Technical report petu C Lal-tlanthanga, MSSC secretary sawi danin, RG Stadium-a floodlight siamna turin kum 2018-19 khan NEDP aṭangin cheng nuai 800 hmuh a ni a, Infrustructure Deve­lopment Consortium, Shillong-in thawkin, December 2, 2019 khan an siam zo a ni.

RG Stadium-a floodlight chu Asian Football Confederation-in a pawm chin, 1200 Lux aia êng sang zawk a ni a, tuna a êng pek chhuah theih zat chu 1549 Lux a ni. A ban san zawng chu metre 40 a ni a, ban pakhatah bulb 34 zel vuah a ni. Electric current hman ngai loin, gene­rator 180 KVA pali hman a ni.