KHAWTHLIR

KṬP-te'n thisen pe

KṬP, Kulikawn Pastor Bial chuan nimin khan ZMCH tan thisen unit 74 an pe a, petute mipa 53 leh hmeichhia 21 an ni a; KṬP, Chawnpui Branch pawhin an din champha pualin Synod Hospital tan thisen unit 31 an pe a, petute mipa 30 leh hmeichhia pakhat an ni. KṬP, Tlabung Zodin Bial chuan nimin vek khan Zodin Kohhran Sunday School Hall-ah thisen pek huaihawtin, Lunglei Civil Hospital tan unit 38 an pe a, petute mipa 35 leh hmeichhia pathum an ni.

Kawng khâr dawn

Traffic SP Ruatsanga Ralte chuan hriattirna chhuahin, PWD-in kawng an thawm ṭhat dawn avangin Electric Venga kawngpui ṭhenkhat chu chhun lamah khâr a ni dawn tih a tarlang. Traffic SP tarlan danin, November 4-9, 2025 chhungin Electric Venga Sakawrpului leh Zirtiri College hlui inkar kawng siam a ni dawn a, November 10-12 chhungin Electric Veng Presbyterian Kohhran biak-in hnuai kawng siam a ni dawn. Kawng siam chhung zing dar 9 leh tlai dar 5 inkarah kawng khâr ṭhin a ni ang.

Emergency vehicle

UCO Bank chuan corporate social responsibility aṭanga an lei, chhiatna a thlen changa hman tur lirthei (emergency response vehicle) chu November 4, Thawhlehni khan Aizawl Municipal Corporation (AMC) hnenah an hlan. ERV atan hian Mahindra Bolero Camper leh a siam danglamna tur sum leh hmanrua cheng nuai 15 hu chu Aizawl mayor Lalrinenga Sailo hnenah an hlan a ni.

Model locality thlang

Lawngtlai bawrhsap Donny Lalruatsanga kaihhruaiin November 4, Thawhlehni khan a pisaah Mizoram khawpui fai inelna, Mizoram Cleanliness Competition 2025 neih tura inbuatsaih dan tur sawiho a ni. Bawlhhlawh ṭawih thei leh ṭawih thei lo thliar chungchang uar zawka inzirtir an rêl a; ṭawih thei leh ṭawih thei lo thliar chungchangah Lawngtlai New Vengpui chu veng dangte entawn tur 'model locality' atan an thlang. Lawngtlaia veng tinte'n inelna thianghlim buatsaih se an ti bawk.