Gas pipeline km 28 phûm a ni tawh

November 4, Thawhlehni khan Food, Civil Supplies and Consumer Affairs (FCSCA) minister B Lalchhanzova hoin a pisaah North East Gas Grid (NEGG) hnuaia Tripura aṭanga Mizorama gas pipeline phûm mek thlirho a ni a; Mizoramah gas pipeline km 28-a thui phûm a nih tawh thu an tarlang.

Ṭhutkhawma tarlan danin, gas pipeline hi Panisagar, Tripura aṭanga Sihhmui, Mizoram thlenga phûm tur a ni a; Tripura huam chhungah km 15-a thui phûm tur niin, Mizoram chhungah km 104-a thui phûm tur a ni. Tun dinhmunah km 28 vela thui phûm a ni tawh.

Gas pipeline phûm hna hi ṭha taka zawh a nih theih nan leh a rang lama zawh a nih theih nan Mizoram sorkarin a theihtawp a chhuah a, hna thawktu Indradhanush Gas Grid Limited (IGGL) pawhin a rang thei ang bera zawh a nih theih nan hma a la reng a ni.

FCSCA Minister chuan, chawlhkar tin hnathawh chin hriattir ṭhin tura a dil anga an hrilh ṭhin avangin IGGL chungah a lawm thu a sawi a, "Amaherawhchu gas pipeline phûm hna hi in thawk chak tawk lo," a ti a; chak zawka hna thawh a nih theih nan an hotute pawh a dawr dawn thu a hrilh.

FCSCA hotute pawhin gas pipeline chu tun aia chak zawk leh rintlak lehzuala phûm a nih theih nan a hmunah enpui an tum a ni.