State 8 leh UT 3 foundation day lawm

Governor Gen. Dr Vijay Kumar Singh hoin October 4, Thawhlehni khan Raj Bhavan-ah Ek Bharat Shreshtha Bharat hmalakna hnuaiah union territory pathum - Delhi, Lakshadweep, Puducherry leh state pariat - Kerala, Karnataka, Madhya Pradesh, Tamil Nadu, Haryana, Punjab, Uttrakhand leh Jharkhand te foundation day lawm a ni.

Foundation day lawmnaah hian state pariat leh UT pathumte chanchin tlangpui tarlan a ni a, ICFAI University leh National Institute of Technology, Mizoram zirlaite'n hnam lâm an entir a ni. He hunah hian state leh UT din ni lawmsak mi leh sa, Mizorama awmte an tel.

Governor chuan, Ek Bharat Shreshtha Bharat chu India rama hnam hrang hrangte inpumkhatna leh inunauna ṭha siamna tura ruahman a nih thu a sawi a; kal khawmte chu an kalna hmun apiangah mahni state leh hnam ziarâng, nunphung leh tih dante chawi lâra mi dangte zirtir ṭhin turin a chah.

Sorkar thuchhuah tarlan danin, November 1, 1954 khan Puducherry chu UT-ah puan a ni a; November 1, 1956 khan Delhi leh Lakshadweep chu UT-ah siam niin, hemi ni vek hian Kerala, Karnataka, Madhya Pradesh leh Tamil Nadu-te chu state-ah hlankai an ni.

November 1, 1966 khan Haryana leh Punjab chu siam remin state-ah siam an ni a; November 9, 2000 khan Uttrakhand state siam niin, November 15, 2000 khan Jharkhand state a piang bawk.