KṬP General Conference Hlabu tlangzarh

Central KṬP-in KṬP General Conference 2026 Hlabu a buatsaih chu November 4, Thawhlehni zan khan YRC Convention Centre Hall-ah CKṬP leader Rev. H Lalawmpuia'n Pathian hnenah hlanin a tlangzarh.

KṬP General Conference 2026 Hla Bu-ah hian hla 52 awmin, chu'ng zinga pali chu lengkhawm hla a ni a; a man chu a pangngai Rs 60, spiral binding Rs 80 leh A4 size Rs 150 a ni.

Conference hi February 26 - March 1, 2026 chhungin Saitualah neih a ni dawn a, thupui tur chu 'Lalpa tana mi hlang' tih niin, Rev. PC Lalropuia speaker a ni ang.

Hlabu tlangzarh inkhawmah hian CKṬP-in ruihhlo dona puala video clip insiamsiak a buatsaih result puan a ni bawk a, lawmman sem nghal a ni.

Ruihhlo do video clip insiamsiakah hian video 128 a lut a, Aizawl khaw chhung aṭangin branch 78, Aizawl páwn aṭangin branch 48 leh Mizoram páwn aṭangin branch pahnih an ni. Champhai Vengsang Branch chu pakhatna an ni a, Lunglei Bazar Veng Branch pahnihna niin, Armed Veng North Branch pathumna an ni.