Serchhip MJA leh AR hotute inkâwm

Serchhipa inkulh 14 Assam Rifles hotute leh MJA, Serchhip district hotute chu November 4, Thawhlehni khan AR hmunah an inkâwm a, kawng hrang hranga thawhho dan tur an sawiho.

Assam Rifles second-in-command Lt. Col. Sunil Kumar chuan, AR-te chu 'Tlang mite ṭhian' an nih angin 14 AR-te chu Mizoram mipui tana thawk turin an inhlan tih a sawi a; MJA-te nen kawng hrang hranga thawhho an duh a, a bikin riuhhlo donaah theihtawp chhuahho an duh thu a sawi a ni.

Lt. Col. Sunil Kumar chuan, khawtlang tana 14 Assam Rifles hmalakna hrang hrang te sawiin, hnuchhamte tan chhawmdawlna an pek ṭhin thu te, khaw hrang hrangah a thlawna inentirna an buatsaih ṭhin thu te, YMA leh MHIP-te hmalaknate an theih anga an puih ṭhin thute a sawi.

MJA Serchhip district vice president Kapliana Pachuau chuan, khawtlang tana Serchhipa AR-te hmalaknate chu an hriatpui thu leh, a bikin ruihhlo donaa an hnathawhte pawh an hriat thu a sawi a; ruihhlo donaah Serchhipa journalist-te'n an theihna zawnah theihtawp chhuaha thawhpui an tum thu a sawi bawk.