Lawngtlaiah in chimin mi 5 a chimpui

Nimin zinga ruahsur lai, dar 3 vel khan Lawngtlai Vengpuia Vanlalawii in, Assam type chu a chim a, mi panga chimpui mah se, thi an awm lo a, hliam na lutuk pawh an awm lo.

Lawngtlai aṭanga thu dawn danin, in chim lai hian in chhungah Vanlalawii bakah a fapa, a fanu leh a tute pahnih an awm a; in chhâwng chung zawkah mi pathum riakin, chhâwng hnuai zawkah pahnih an riak a ni. Mi pangate hi nimin zing vek khan lak chhuah an ni a, hliam awm mah se, ngaihtuahawm lutuk an awm lo a ni.

In chim hi nimin khan Lawngtlai District Disaster Management Authority (DDMA) chairman Donny Lalruatsanga, bawrhsapin a tlawh nghal a; chhiat tâwkte chu sorkar aṭanga ṭanpuina awm thei ang ang pek an nih tur thu a sawi a, hnatlâng thawkte ei leh in senso atan pawisa a pek bakah, silpaulin a hlan nghal.

Lawngtlai Bawrhsap chuan, chhiat tâwkte a tawrhpui thu a sawi rualin, vanneihthlak taka thi an awm lo leh hliam na lutuk an awm lo chu lawmawm a tih thu a sawi a; dam ṭha leh thuai turin duhsakna a hlan a ni.