Thiamthil zirna tur model centre hawng

School Education director Angela Zothanpuii chuan nimin khan Edenthar Veng Branch YMA Committee Room-ah thiamthil zirna (skill training) kalpuina tur Model Centre a hawng.

Model Centre-ah hian thil hrang hrang - mau hmanga thil siam (cane & bamboo works), puanṭhui, electric/house wiring, chhang ur (baking technology), pickle & jam siam leh critical life skill-te inzirtir a ni dawn.

Skill training hi School Education department hnuaia Adult Education Wing-in kum 2020-21 aṭangin district hrang hrang leh Aizawl veng ṭhenkhata Critical Life Skills and Occupational Skill Development Programme a kalpui chhunzawm zelna a ni a; skill training-ah hian mi 482 an inzir chhuak tawh.

Angela Zothanpuii chuan, Mizoram chu ziak leh chhiar thiam tam lamah India ramah sang ber mah se, eizawnna leh hmasawnna atana pawimawh thil hrang hrangah a theih ang anga hmalak zel a ṭul thu a sawi a, "Skill training hi a pawimawh hle. Hmun hrang hrang aṭanga dil an awm laiin Edenthar Vengah hian skill training hi hlawhtling taka kalpui theih a nih kan beisei avangin model centre hi hawn a ni," a ti a; local level committee hruaitu te, trainer leh trainee-te chu theihtawp chhuah turin a chah.