Mizoram Youth Commission chairman-in MYC member paih leh ruat dan sawifiah

Mizoram Youth Commission (MYC) chairman Dr Vanlalṭanpuia chuan, MYC member ṭhiah leh a thar ruat chungchang chu politics-a inchirhtheh nan hman chi nia a ngaih loh thu leh, MYC-a thawk, sorkar hnathawk nghet ni lote chu thawh hun chhung nei an nih avangin loh theih loha chawlhtir an nih thu a sawi.

MYC member-te nen nimina MYC Chairman pisaa an ṭhutkhawmnaa Dr Vanlalṭanpuia sawi danin, sorkar hmasa hun lai, February 14, 2014-ah kum thum atan MYC member ruat a ni a; mahse, kum khat hnuah ṭhiah niin, May 7, 2015-ah MYC member thar ruat leh a ni. Congress sorkar lai tho, June 29, 2018-a MYC member ruatte ṭhiahna leh MYC member thar ruatna chu October 10, 2019 khan sorkarin a chhuah a ni.

MYC member ruat chungchangah hian Chairman chuan, a ṭul anga sorkarin a rua­hman fel a nih avangin politics inchirhtheh nana hman chi nia a ngaih loh thu a sawi. MYC-a thawkte chungchangah Dr Vanlalṭanpuia chuan, MYC Chairman kal chhuak ta hun lai, kum 2018-ah kum khat chhung thawk turin hna hrang hrang atan thawktu mi eng emaw zat lak a nih thu a sawi a, "An hun kum khat a tawp chuan sorkar leh kan hotute pawh ráwn loin an thawh hun kan tihseisak zawk a. Mahse, dan tlawhchhan tur leh thu tling behchhan theih a awm rih loh avangin, dan ang leh sorkar min phalsak theih anga tha thara kan ngaihtuah tlàn a ngaih thu kan thawktute chu thil awmzia ṭha taka inhrilhin kan inchawlhtír lo thei lo a ni," a ti.

MYC Chairman chuan, MYC hmalakna chu Mizoram ṭhalai a tam thei ang berin an chhawr theih turin ruahmanna hrang hrang an duang mek tih sawiin, MYC mamawh dan milin thawktu lâk phalna sorkarah an dil dawn thu a sawi.

Dr Vanlalṭanpuia'n MYC hnuaia UPSC civil service (IAS) online coaching kalpui ṭhin tihtàwp chungchang a sawi danin, MYC hma­laknain IAS online coaching hi Aizawlah VSAT kháwl bunin, batch hmasa ber chu March 2016-ah kalpui ṭan a ni a, August 2016-ah batch 2-na, June 2017-ah batch 3-na leh August 2018-ah batch 4-na kalpui a ni.

IAS online coaching chu member 12 telna MYC consultation meeting-in July 25, 2019-ah an ngaihtuah tih sawiin Vanlalṭanpuia chuan, "IAS online coaching kalpui tawh chu preliminary examination tlinpui pawh an awm thei lo nia hriat a nih avangin, kalphung thlâk danglam a, MYC hnuaia online coaching chu tihtawp ni se, IAS, IPS leh IFS nih tum tak tak Mizo ṭhalaite an tlin ngei theih nan theihtawp chhuaha hma thar lak ni se, tiin a rél a ni," a ti.