College leh DC pisa-a kai tur dang

Lawngtlai College-a assistant professor pahnih sawn chhuak a, an aiawh dah nghal a nih si loh avangin Lai Student Association (LSA) chuan lungawi lohna lantirin nimin khan Lawngtlai College leh DC pisaa hnathawk kal turte an dang. LSA leh Lawngtlai College Students Union ṭangkawp chuan vawiin aṭangin Lawngtlaia sorkar pisa zawng zawng dan an tum bawk.

Lawngtlai aṭanga thu dawn danin, Lawngtlai College-a assistant professor pahnih transfer order chu October 30, 2019 khan tihchhuah a ni. An aiawh tur dah a nih loh avangin zirlaite chuan Mizoram sorkar hnenah an sawn chhuahte aiawh dah tur leh mi dang dah an nih loh chuan transfer order sût turin an ngen a ni. 

Lawngtlai College SU chuan, December 3, Thawhlehni khan college kal turte an lo dang tawh a, nimin khan LSA huaihawtin Lawngtlai College leh DC pisa-a kal turte an dang leh a ni. College bikah, MA exam laite erawh chu an dang lo thung.