CM hoin MIAS kalpui dan tur rêl

Chief minister Lalduhoma kaihhruaiin nimin khan CMO conference hall-ah Mizoram Institute of Advanced Studies (MIAS) Governing Body an ṭhukhawm a, awmze nei zawka MIAS kalpui dan tur an rêl.

Ṭhutkhawmah hian hmalak zel dan tur zirchiangtu tur Review Committee, MZU vice chancellor hlui Prof. R Lalthantluanga kaihhruai an din a, member-ah MIAS Governing Board Vice Chairman leh Member Secretary bakah, NIT, Mizoram Director leh Pachhunga University College-a associate professor Dr Rohmingmawii te an tel.

Mizoram sorkar chuan MIAS hi nung zawka kaltir a tum mek a, office atan MINECO-ah hmun pek a ni a; ṭhutkhawmah hian MIAS office-a thawktu dah thar chungchang te, sum leh pai dap dan tur leh pek dan tur te, institution dangte nena thawhhona chungchangte sawiho a ni bawk.

Sorkar thuchhuah tarlan danin, MIAS hi kum 2011 khan Mizoram sorkarin a din a, zirbingna chi hrang hrang kalpuina hmun (autonomous research institute) tura duan a ni. Sorkar laipui sum ringa enkawl tur leh Ministry of Human Resource Development hnuaia regional institute ni thei tura ruahman a ni a; Planning & Programme Implementation department chu nodal department a ni.