KHAWTHLIR

Vuivaina 153 a lut

Health & Family Welfare department hnuaia pisa hrang hrang leh damdawi-inte laka vuivaina leh lungawi lohna thlen duhte tan online hmanga thlen theihna tura siam 'Vahui' online grievance portal-ah vuivaina 153 a lut tawh a, 151 chinfel tawh niin, pahnih chu bawhzui mek a ni. Vahui portal hi August 19, 2024 khan tlangzarh a ni.

MLA-in sum hlan

Mizoram sorkar leh tlawmngai pawlte ṭangrualin ruihhlo do beihpui an thlakna, Operation Jericho atana a ṭul anga hman turin MJA, Lawngtlai District chuan nimin khan Lawngtlai Bawrhsap hnenah Rs 5,000 an hlan.

Hnathawh thlirho

Saitual district bawrhsap Dr Lalngura Tlau kaihhruaiin nimin khan a pisaah PWD hnuaia SASCI aṭanga Saitual district-a hmasawnna hnathawhte thlirho a ni. Saitualah hian SASCI aṭangin Circuit House, DC Bangla leh Reveneu staff quarters te sak mek a ni a; District Jail leh District Research office-te thawm ṭhat mek a ni bawk.

Training hawng

School Education department leh Serchhip Sub-Hqrs YMA hmalaknain Sub-Hqrs YMA conference hall Serchhip Model Centre-a kalpui tur ‘Critical Lifeskills and Occupational Skill Development Training Programme’ chu nimin khan hawn a ni. Centre-ah hian puanṭhui, chhang ur, incheina lam, electric wiring leh plumbing te inzirtir a ni ang.

Lehkhabu tlangzarh

Prof. Laltluangliana Khiangte lehkhabu ziah, 'Tribal Culture, Folklore and Literature' tih chu nimin khan Mizoram University Mizo department HoD Dr Zoramdinthara'n MZU Deans Conference Hall-ah a tlangzarh. Lehkhabu hi a tirah chuan Dr Laltluangliana'n thesis atana a buatsaih, 'An Introduction of Mizo Folklore and Literature' tih a ni a, ennawna a tihbelh hnuah lehkhabu angin a siam a ni.