Mizoramah MGNREGA job card nei chhungkua 2,12,043 an awm mek

Mizoramah ni 100 inhlawhna (MGNREGA) job card nei chhungkaw 2,12,043 an awm mek a, chu'ng zinga 2,10,574 chu active job card niin, inhlawh ṭhin 2,37,079 an awm. Rural Development & Administration (RDA) minister Prof. Lalnilawma chuan, ni 100 inhlawhnaa thawktute hlawh tur pawisa a awm thu sawiin, hlawh an lak vat theih nan hma an lak mek thu a sawi.

Nimin khan RDA Minister hoin Aijal Club-ah RDA department hnuaia central scheme hrang hranga hmalaknate thlir let a ni a; Minister chuan, "MGNREGA hnuaia thawktute'n a hunah hlawh an la lo hi a pawi hle. Sum awm reng mah se, technical problem vangin an hlawh pek chhuah a la ni thei lo a, hlawh an lak vat theih nan hma kan lak mek," a ti.

Prof. Lalnilawma chuan, field level-a thawktute'n dik taka hna an thawh a pawimawh thu sawiin, "RDA department hi thingtlang mite innghahna ber leh khawtlang tihhmasawnna tur thil ṭangkai siamtu a nih avangin chak taka hna thawh zel a pawimawh," a ti a; The Mizoram (Village Councils) Act, 2025-in thingtlang khaw hrang hrangte tihhmasawnna atana hma latu tur village development committee din ni se, a tih angin committee din a nih tur thu a sawi.

Ṭhutkhawmah hian RDA Secretariat leh Directorate hotu te, SIRDPR, MzSRLM, LA Directorate leh Social Audit hotute'n an hmalak dan leh hmachhawpte an tarlang a; ṭha zawka hmalak dan tur leh thawhho zel dan turte sawiho a ni.

Directors' Award sem nghal a ni a; award hi project director zingah Aizawl, Lunglei leh Siaha DRDO-te'n an dawng a, BDO zingah Lunglei, Champhai leh East Lungdar BDO-te'n an dawng bawk.

ṬHUTKHAWMA TARLANTE
▶ Mizoramah MGNREGA job card 2,12,043 pek chhuah tawh a ni a, active job card 2,10,574 (99.30%) a awm.
▶ MGNREGA hnuaiah worker 2,37,079 an awm a, chu'ng zinga 2,10,900 (88.95%) chu active worker an ni.
▶ Active job card leh active worker awm zatah Mizoram chu India rama a ti ṭha pawl a ni.
▶ Sorkar kum kal mek 2025-26 atan tun thleng hian person days 51.59% zawh tawh a ni.
▶ Ni 8 chhunga hlawh pek chhuah zat 92.42% a ni a, Mizoram chu a ti ṭha pawl a ni.
▶ Aadhaar based payment system (ABPS) ṭha taka kalpui a ni a, Hnahthial, Khawzawl leh Lawngtlai district-ahte 100%-a kalpui a ni.