Aizawlah Handloom Expo 2019 hawng

Mizoram Handloom and Handicrafts Development Corporation Limited (ZOHANDCO) chuan nimin khan Zarkawt Recreation Centre-ah Aizawl Special Handloom Expo 2019 an buatsaih a, Commerce & Industries minister Dr R Lalthangliana'n a hawng.

December 7, Inrinni thleng awh tur Expo hawnna hi ZOHANCO managing director Lalramsanga Sailo-in a kaihruai a; Dr R Lalthang­liana chuan, puantah lama eizawng mekte chu Mizote hnam ziaráng pho chhuaktu an nih thu sawiin, "Mizo nihna a taka lantirtute an nih avang­in an eizawnna hi hna zah­awm leh ropui leh danglam tak a ni," a ti. 

Minister chuan, Mizo incheina leh inthuamnate mi­puiin an ngaihsan theih nan leh puantah leh a kaih­hnawihte chawikân a nih theih nan sor­karin Nilaini apiangin sorkar hnathawkte Zo thuam ha turin a ngen tih a sawi a; Mizoram páwna trade fair-a phochhuah turte thlan uluk a ṭul thu leh export quality ṭha taka siam a pawimawh thu a sawi bawk.

Aizawl Special Handloom Expo hi Ministry of Textiles-a Development Commissioner for Handloom bultuma buatsaih a ni a; stall/dawr 30 vel siamin, Mizo puan leh kut chhuak chi hrang hrang zawrh a ni.