Lungleiah kutdawh zir chiang dawn

Lunglei district bawrhsap Navneet Mann hoin nimin khan Lunglei district-a sorkar laipui Ministry of Social Justice & Empowerment hnuaia kutdawhte dinhmun siamṭhatna tur ruahmanna, 'Support for Marginalised Individuals for Livelihood and Enterprise (SMILE) kalpui dan tur sawiho a ni a; hmalakna bul ṭan nan Lungleia veng pali-ah kutdawh awm zat zir chian an rêl.

SMILE kaltlanga hmalakna turah hian Lunglei khawpuia kutdawh awm zat zirchian (survey) hmasak tur a ni a, kutdawhte dinhmun leh nihphung (profile) chhinchhiahna aṭangin ID card siamsak an ni dawn. Kutdawh ngai loa eizawnna leh mahni intunnunna an neih theih nan thiamthil inzirtirna leh kaihhruaina bakah, a ṭul anga hmalakpui chhun-zawmna turte scheme-ah hian ruahman a ni.

Navneet Mann chuan, SMILE chu vantlang zinga dinhmun chhe zawk (marginalised individual)-te'n nun khawchhuahna leh eizawnna ṭha an neih theihna tura sorkar laipuiin a ruahman a nih thu leh Lunglei khawpui chhungah pawh kalpui tur a nih thu a sawi.

Ṭhutkhawmah hian hmalakna bul ṭan nan Lungleia veng pali - Bazar Veng, Chanmari, Electric Veng leh Venglaiahte zirchianna kalpui hmasak ni se, an ti a, survey team pali an din. Zirchianna hi January 15, 2026 hmaa zawh hman tura ruahman a ni a, zirchianna report azirin hmalak zel dan tur ruahman a ni ang.