Gender Based Violence Solve Project hawng

Social Welfare, Women and Child Development minister Lalrinpuii chuan nimin khan a pisaah hmeichhiate chunga hleilenna thleng ṭhin tihbo atana hmalakna tura duan, Gender Based Violence (GBV) Solve Project a hawng a; Mizoramah hmeichhe chunga hleilenna a pun nasat thu a sawi.

Lalrinpuii chuan, hmeichhiate chunga hleilenna thleng ṭhin tihbo a ṭul thu a sawi a, "Mizoramah hmeichhe chunga hleilenna a pung nasa. Kum 2022-23 chhung khan Women Helpline-ah case 3,094 report a awm a, kumin February-ah chuan case 12,750-ah a pung chho tawh. Hmeichhe dinhmun a ṭhat chuan chhungkua a ṭhang a, khawtlang pawhin hma a sawn ṭhin a ni," a ti.

GBV Solve Project-in hmeichhe chunga hleihlenna chauh a bitum dawn lo tih sawiin Minister chuan, "Mipa naupang leh hmeichhe naupangte'n hemi chungchang zirtirna nasa tak an dawng dawn a, hmeichhe chhawmdawl ngaite eizawnna tlak khawpa thiamthil zirtirna a keng tel dawn," a ti bawk.

Project hi Aparajita leh J-PAL South Asia ṭang dun hmalakna a ni a, Mizoramah chuan Mission Foundation Movement (MFM)-in a kalpui ang. Hawnna inkhawmah hian WCD director Zoramthangi Chhangte, MFM executive director Lalramchuanzela leh, Aparajita leh J-PAL South Asia Team aiawhte pawhin thu an sawi.

MFM hian Aizawl district-a hmeichhiate chunga hleilenna thleng ṭhin tihbo nan mahni invenna, mipui hrilhhriatna leh a tuartute enkawl kawngah WCD nen ṭangkawpin hma an la dawn a ni.