Thiamna nei loa damdawi chawh ṭhinte lakah hmalak a ni dawn

Serchhip district bawrhsap Paul L Khuma kaihhruaiin nimin khan District Registering Authority chuan Clinical Establishment Act chungchang an sawiho. Doctor anga inchhálte leh thiamna nei si loa damlo hnena damdawi chawh ṭhinte lakah mipui an him theih nan hmalak a nih dawn thu tarlan a ni.

Paul L Khuma chuan, Clinical Establishment Act chu mi náwlpui tan thil thar a nih thu a sawi a, "Mipuiin chiang taka an hriat fiah theih nan hmalak a pawimawh. Thiamna nei loa damdawi inchawh hian nghawng ṭha lo leh thil pawi tak a thlen thei a, nunna hlu tak chàn theihna pumpelh turin theihtawp chhuah a ṭul," a ti.

Serchhip CEA district coordinator Dr Albert Ngurnuntluanga chuan doctor anga inchhálte leh thiamna nei si loa damlo hnena damdawi sang tak tak lo chawh ve ṭhinte lakah mipui an him theih nan District Registering Authority chuan hma an lak dawn thu leh an vilzui zel tur thu a sawi a; fimkhur turin mipui a chah bawk.

Ṭhutkhawmah hian Clinical Establishment Act hnuaia inziah luh theih dan leh dan loa hma late hremnate tarlan a ni a; tun dinhmunah Serchhip district-ah clinic reagister 28 awmin, register loh clinic pakhat leh laboratory pakhat a awm mek thu tarlan a ni.