North Khawbung centenary lawm a ni

Nimin khan North Khawbung Centenary Committee chuan an khaw kum 100 (centenary) tlin an lawm a, chief minister Lalduhoma leh bialtu MLA H Ginzalala, adviser to CM te'n an hmanpui.

Centenary lawmna hmun Lalruanga Hmun, North Khawbung Playground-ah CM Lalduhoma chuan, "He hun ropui takah ka telve thei hi ka lawm hle. North Khawbung lal ni ṭhin Thanghlianga Sailo kha a fakawm hle, khaw ropui tak a din theih chhan pawh a fin leh remhriat em vang a ni," a ti.

Lalduhoma chuan Mizo pi pute sulhnu ṭha tak tak a awm tih sawiin, "Art & Culture department-in a humhalh mek Lalruanga lungte a awm a, ṭha takin humhalh ang che u. Mahni khua tihmasawn tur chuan mahni vek kan pawimawh," a ti a, mahni khaw tana ṭan la zel a, hmangaih taka enkawl turin a fuih.

CM Duhoma chuan naupang leh ṭhalai lehkha zir mekte an zirna aṭanga eizawnna ṭha tak hmua nun ṭha pan turin a fuih a, "Kum 200 an tlin hun pawha hlim taka in lawm theih nan kawtthler te, in sak dan te, tuichhe paih dante leh khua enkawl dante khuarei daih tur mil zawngin kal zel rawh u," a ti a, a ṭha zawnga mi sawi an nih zel theih nan duhsakna a hlan.

H Ginzalala pawhin hun hlimawm tak hmang turin duhsakna a hlan a, Mizo mize nun mawi vawng nung reng turin a fuih a ni.

North Khawbung khaw kum 100 tlin lawmna inkhawm hi VCP C Tlangluaia'n a kaihruaia, tlaiah centenary ruai an buatsaih chu khaw pumin an ṭheh a, zanah concert an buatsaih bawk.