Doctor ṭhenkhatin damlote customer angin an en ṭhin - K Sapdanga

Zoram Medical College Faculty Doctor's Association chuan nimin khan Aijal Club-ah inkhawmpui an hmang a, an hun hmanpuitu minister K Sapdanga chuan doctor ṭhenkhat chuan an damlote customer anga an en ṭhin thu a sawi.

K Sapdanga chuan doctor ṭhenkhat chuan anmahni pantu damlote chu damlo ang ni loin, customer anga an en ṭhin thu sawiin, "Damlote hi an natna enkawl sak piah lamah hriatthiamna nen, dawhtheihna nen enkawl an nih chuan an natna nasa takin a chhawk thei," a ti.

Khawvel ṭhang zelah natna tharte chhuakin, rilru lama harsatna neite an pun zel thu sawiin K Sapdanga chuan, "Research lamah theihtawp chhuah chhoh zel a ṭul. Medical institution ṭhatna hi a building leh techology ringawt a ni lo," a ti a, inpekna leh thawhhona ṭha a pawimawh thu a sawi.

K Sapdanga chuan ZMC Faculty Doctor's Association member tinte chu zirtirna, research tihna leh thildangah dinhmun pawimawh tak an luah tih sawiin, "Doctor lo ni zel turte chher chhuaktu in ni a, in dinhmun hi a pawimawh takzet," a ti a, theihtawp chhuah zel turin a chah.