LADC inthlanpui December 3-ah

State election commissioner (SEC) Dr H Lalthlangliana chuan nimin khan Lai Autonomous District Council (LADC) Member of District Council (MDC) inthlanpui neih hun atan December 3, 2025 ruat a nih thu a puang. Nimin aṭang khan LADC huam chhungah Model Code of Conduct (MCC) puan nghal a ni.

Dr H Lalthlangliana chuan, inthlanna thianghlim, felfai leh muanawm a awm theih nan inthlanna buaipuitu official te, political party, media, NGO leh mipui ṭawiawmna a ngen a, "Mipui duh thlanna kaltlanga tualchhung inrelbawlna ṭha tak kan neih theih nan theihtawp chhuah ṭheuh turin mi tin kan sawm a ni," a ti a; vote nei zawng zawngte chu democracy tihlawhtling tura vote thlak ṭheuh turin a sawm.

LADC hnuaia MDC term kal mek hi December 18, 2025-ah a tawp dawn a; LADC-ah hian MDC bial 25 awmin, voter 56,873 (mipa 27,754 leh hmeichhia 29,019) an awm. Nimina inthlan hun tur puan a nih rual hian LADC huam chhungah MCC puan nghal a ni a, MCC hi inthlan kaihhnawih thil zawng zawng tihfel vek ni tura ruat December 12, 2025 thleng kalpui a ni dawn.

LADC MDC bial 25 zingah polling station pariat awmna Sakeilui bialah voter tam berin mi 3,993 an awm a; polling station pahnih awmna Cheural bialah voter 1,381 awmin an tlem ber. Voter tamna ber polling station Pangkhuaah voter 1,189 awmin, voter tlemna ber Hmawngbuchhuah PS-ah voter pakhat chiah a awm.

Lirtheia pan theih loh, kea kal ngai polling station pathum leh lawng hmanga pan ngai polling station pali a awm a; critical polling station a awm lo thung.

LADC MDC roll-a hming chuang, MDC inthlan atan an hman avanga mahni vote neihnaa vote thlak thei lo sorkar hnathawkte tan vote thlak dan tur ruahman a ni a; sorkar hnathawk, MDC inthlan atana hmante chuan an mahni vote neihna bialtu Returning Officer hnenah dilna thehluh tur a ni.

LADC MDC Inthlan
Notification chhuah hun - November 7, 2025
Nomination file hun tawp - November 14, 2025 tlai dar 3:00
Nomination endik ṭan hun - November 14, 2025 tlai dar 3:00
Inhnuhdawh hun hnuhnung - November 17, 2025 chhun dar 12:00
Candidate list tihchhuah - November 17, 2025
Vote thlak hun - December 3, 2025 zing dar 7 - tlai dar 4
Vote thlak ṭhat (a ṭul chuan) - December 4, 2025 zing dar 7 - tlai dar 4
Vote chhiar hun - December 9, 2025 zing dar 8:00
Inthlan zawh fel hun - December 12, 2025