Phase-III hmangin tui a pump leh theih tawh

Vaivakawn Zohnuai lei tlahniam avanga Aizawl khawpui tana Tlawng lui tui pump-na khawl lian ber, 37MLD Water Treatment Plant (Phase III) pipe lian chhia chu siamṭhat a nih hnuah nimin aṭanga khan Laipuitlangah tui pump chho leh ṭan a ni a; PHE minister Prof. Lalnilawma chuan, "Mizoram sorkar chuan mipuite’n tui thianghlim hnianghnar taka an neih theih nan theihtawp a chhuah a, a chhuah zel dawn," a ti.

PHE minister Prof. Lalnilawma chuan, fur ruahsur nasa avanga lei tlahniam vangin Tlawng lui (Setlak) tui lakna pipe lian chu Vaivakawn Zohnuaiah a chhiat thu a sawi a, "Khuarel chhiatna avangin leh khuain a zir loh mai bakah, harsatna hrang hrang avangin pipe chhia hi siamṭhat lawk theih a ni lo a, mahse, theihtawp kan chhuah. Pathian kaihhruaina hnuaiah PHE department-a thawk tute zarah siamṭhat a ni ta. Mizoram sorkar chuan mipuite’n tui thianghlim hnianghnar taka an neih theih nan theihtawp a chhuah a, a chhuah zel dawn," a ti a; sorkar hmalaknate ṭawiawm zel turin mipui a sawm.

Vaivakawn Zohnuaia pipe chhia hi a lian tham a, siam a hautak hle tih sawiin Prof. Lalnilawma chuan, "PHE department mai chuan engkim tihfel theih a ni lo a, sorkar department dang PWD, PE, DMR bakah, Aizawl DC, Traffic SP leh thawktu te, Vaivakawn khawtlang hruaitute leh mipuite nen theihtawp kan chhuah tlâng a, an chungah kan lawm takzet a ni. He pipe chhia avang hian Aizawl mipuite’n tui an harsat phah tih hi kan hria a, hreawm kan ti hle. Chutichung chuan Aizawl mipuite’n sorkar sawisel mai loa kan harsatna tawhte min hrethiam a, min dawh theih avangin kan lawm takzet a ni," a ti.

PHE department tarlan danin, 37MLD Water Treatment Plant (Phase III) pumping main hi Vaivakawn Zohnuai lei tlahniam avangin June 2, 2025 khan a chhia a; fur lai a nih avang leh lei chêtna hmun a nih avangin siam mai theih a ni lo a, August 26, 2025 aṭangin siamṭha tura hmalak ṭan a ni. Lei tlakhniamna laiah PWD-ten hmalakna an neih ve tho avangin PHE lamte nen hmalak dan turah an insiamrem a; November 4, 2025 khan siamṭhat niin, ṭul dang hrang hrangte buaipui a nih hnuah nimin aṭang khan Laipuitlanga PHE tuizem lianah tui pump chhoh leh ṭan a ni.