KHAWTHLIR

KṬP-in thisen pe

KṬP, Ramhlun Vengchhak Branch chuan nimin khan an kohhran hall-ah thisen pek huaihawtin, Civil Hospital, Aizawl tan thisen unit 23 an pe a, petute mipa 19 leh hmeichhia pali an ni.

Naupang 248 sponsor dawn

Khawzawl District Child Protection Unit hnuaia sponsorship programme atana naupang ṭanpui ngai thlang chhuaktu Sponsorship and Foster Care Approval Committee (SFCAC) chu nimin khan district bawrhsap K Vanlalṭhiana kaihhruaiin an ṭhukhawm a; naupang sponsor tura chhawp chhuah 262 zinga 248 pawm a ni.

Inthlan atan Inbuatsaih

Dampa bial MLA by-election neih tura polling parties-te tan nimin khan Mamit High School leh Higher Secondary School-ah training thawh hnihna neih a ni a; polling station arrangement, poll process, statutory & non statutory forms leh EVM hand on training chungchangte inzirtir a ni.

Ui khuahkhirh

Lawngtlai district bawrhsap Donny Lalruatsanga chuan Lawngtlai khawpuia ui khuahkhirhna thupek a tichhuak a; mahni chenna hmun bakah tlat tir lo tur te, khawlaia chhuahpui dawnin chain-a kai tur te, mumal taka ui hri danna pe turtein ui vulhtute a hriattir. Khawlaia ui tla reng reng neitu awm lo anga ngaih a nih dawn thu leh ui khuahkhirh lohin mihring a seh chuan BNS, 2023 section 291 hmangin ui neitu chu thla ruk chhung lungin tan tir emaw, Rs 5,000 thleng emaw chawi tir theih an nih thu a tarlang.

Thil man rel

Lawngtlai district election officer Donny Lalruatsanga kaihhruaiin nimin khan a pisaah LADC hnuaia MDC inthlanpui lo awm tur kaihhnawihah thil man (rate) hrang hrang rel a ni. Political party-te chu sum leh pai hman theih zat aia tam hmang lo tur leh model code of conduct chu ṭha taka zawm tura chah an ni a; political party aiawhte chuan sum hman phal zat bak an hman loh tur thu an sawi.