CM chungah Pushpak an lawm

Nimin khan Project Pushpak chief engineer Rajeev Dua chuan Chief Minister Office tlawhin PS to CM Lalrinawma Khiangte a kawm a, chief minister Lalduhoma chungah an lawm thu a hrilh.

Project Pushpak CE chuan Mizoram sorkarin working season ṭantira hnathawh phalna (working permission) rang taka a pek avangin Chief Minister chunga an lawm thu a sawi a ni. Pushpak CE hian Chief Minister hi a zin chhuah lai a nih vanga PS to CM hi hmu ta zawk a ni.

Sorkar thuchhuah tarlan dan danin, Mizoram sorkar hian November 4 khan Champhai DDC hnenah Old Hruaikawn to Zokhawthar leh Tualcheng to Pamchung inkar kawng, Border Road Organisation-te thawh tur, phalna an dil mek chu thawh phalna hi a pe a ni.

Rajeev Dua chuan, "Hetianga rang hian permission hi kan hmu ngai mang lo. Kan lawm em avangin Chief Minister hnenah lawmthu sawi tuma lo kal kan ni," tiin CMO a tlawh chhan a sawi.