Minister hoin department hmachhawp sawiho

Rural Development & Administration minister Prof. Lalnilawma kaih-hruaiin nimin khan Aijal Club-ah RDA department hnuaia officer-te pualin thingtlang lam tihhmasawnna tur leh rethei zawkte’n leirem an rah theihna tura sorkar flagship programme hrang hrang kalpui dan leh hmachhawpte sawiho a ni.

Ṭhutkhawmah hian National Rural Livelihood Mission (NRLM), Lakhpati didi, Deen Dayal Upadhyaya Grameen Kaushalya Yojana (DDU-GKY) leh thil dangte zirhona leh hmalaknate thlirlet a ni a; RDA secretary R Zarzosanga’n kaihruaiin, state, district leh block level-a RDA officer-te an tel.

Prof. Lalnilawma chuan, RDA department hnuaiah thawktu thar lut leh chhuak tawk an awm reng avangin chak zawka hna thawh a nih theih nan sorkar hmalakna leh hnathawhte hrechiang tura inzir thar reng a pawimawh thu a sawi a, "Mizorama thingtlang khuate tihhmasawn nan vibrant village programme (VVP) chu khaw 109-ah kalpui ṭan a ni dawn. Thingtlang khuaa chengte leh a bikin nuhote’n eizawnna ṭha zawk an neih theih nan sorkar chuan RDA department hnuaia Mizoram State Rural Livelihood Mission (MzSRLM) kaltlangin theihtawpin hma a la mek a ni," a ti.

Mizorama self help group (SHG)-te chak zawk leh awmze nei zawka an kal theih dan tur chu a thil ngaih pawimawh a nih thu sawiin Minister chuan, "SHG-te thil thar chhuah leh siam chhuahte zau zawk leh hlawk zawka zawrh leh hralh a nih theih nan tun hnaiah SELHEL Brand thar din a ni a, sorkar scheme leh department dangte nen pawh thawhhona ṭha zawk a awm theih nan hmalak a ni.

Ropuiliani Women Farmer Producer Company kaltlangin MIFCO Complex, Chhingchhip-ah sawhting, hmarcha, aieng leh thil dangte sawngbawlna Primary Proccessing Plant bun a ni a, Reliance Industries Limited (RIL)-te nen pawh MoU sign a ni tawh," a ti a; Reliance Fresh Store-ah SELHEL Brand hmanga thil thar leh siam chhuahte zawrh a nih dawn thu a sawi.

ṬHUTKHAWMA TARLANTE
☑ MzSRLM hnuaiah thawktu mi 360 an awm mek a, state level-ah mi 39, district level-ah 25 leh block level-ah mi 296 an ni.
☑ MzSRLM hnuaia thawktu post 90% hnawh khah niin, India rama ti ṭha berte zingah Mizoram a tel.
☑ SHG 11,257 awm mekin, village organization 759 leh cluster level federation 84 a awm.
☑ SHG member kum khata net income Rs 1,00,000 nei (Lakhpati Didi) mi 13,552 an awm mek.
☑ DDU-GKY hnuaiah kawng hrang hranga thingtlang mite intodelhna tur leh thiam thil zirna tur training manual, SOP leh skill development programme-te duan a ni.
☑ DDU-GKY hi MzSRLM hnuaia kalpui niin, a tum ber chu thingtlang ṭhalai kum 18-35 inkarten eizawnna ngelnghet an neih theihna tura skill training pek a ni.
☑ DDU-GKY hnuaiah ṭhalai training chhuak 3,652 awm tawhin, heng zinga 2,136-te chu Mizoram chhungah leh India ram khawpui hrang hrangah hna an thawk mek.
☑ DDU-GKY hnuaia training duh tan mahni bialtu BDO office-ah ngaihven theih a ni.