CYMA-in NH kawngpui an enfiah; Hma an lak zel dan tur an rêl dawn

Central YMA hruaitute chuan November 8, Inrinni khan Vairengte leh Sairang inkar national highway kawng dinhmun an enfiah a, kawng chungchanga hma an lak zel dan tur Central Executive Committee-in an rél dawn.

CYMA president R Lalngheta chuan, Mizorama kawngpui a ṭhat theih nan sorkar leh pawl hrang hrangin hma an la tih a sawi a, "Amaherawhchu kan châk lakna ber kawngpui hi a ṭha mawh hle. YMA-te'n Inkhawmpui Liana kan rêl angin Sairang - Vairengte inkar kawngpui siamṭhat mek kan tlawh a ni," a ti.

R Lalngheta chuan, kawng siamtute chak taka kawng siam tura ṭha taka an hrilh hnuah pawh a ngai reng a la nih chuan, 'Kan rama hna thawk tur hian mi dang lo lut rawh se, nangni chuan min lo hawsan tawh rawh u' an tih hun pawh a awm lo ang tih a sawi theih loh thu a sawi.

CYMA hruaitute hi NHIDCL leh contractor-te'n lo dawngsawngin, hna an thawh mek leh work plan-te an hrilh a, hmanraw lak luh leh thil danga harsatna an tawhte an sawi. CYMA hruaitute chuan harsatna an neihte inhthlahrung loa an hnena thlen zel turin an chah.

Sairang leh Kawnpui inkar kawng chhia siamṭha tur contractor-te chu an hnathawh hun chhunga ṭha tak leh lungawithlak taka thawh zo hman ngei turin CYMA hruaitute chuan an chah a, "In hnathawh dan hi kan en zui zel dawn," an ti.

Kawng endiknaah hian CYMA aṭangin office bearer panga bakah, CEC member mi 37 an thawk chhuak a, PWD aṭangin SE, EE leh SDO te an tel. YMA Sub-Hqrs, Kolasib leh Awithangpa Group YMA hruaitute'n an ṭawiawm bawk.

Kawngpui chhia chungchang hi Kolasib Sub-Hqrs YMA pisa leh Kolasib-a NHIDCL pisaah an sawiho a; chumi hnuah Vairengte-Sairang kawngpui thlur lia laih hna thawh mek an enfiah a, a nih dan tur anga hna thawk turin contractor-te an chah.

Central YMA hian kawng chungchanga an hmuh dan hi CEC-ah an sawi zui dawn a, Mizoram sorkara thlen tur leh NHIDCL leh contractor-te la sawipui zui turte an rel dawn a ni.