Siahaah Poshan Maah kalpui ṭha lawmman dawn an lawm

Siaha district-in Poshan Abhiyaan hnuaia 8th Rashtrya Poshan Maah 2025 kalpuinaa 'Best Performing District' lawmman an dawn chu November 7, 2025 khan Siaha Women and Child Development office buatsaihin MADC Golden Jubilee Hall-ah lawm a ni a, MADC chief executive member M Laikaw-a'n a hmanpui.

M Laikaw chuan, Mizoram pumah nu leh naupang hriselna lama hma la ṭha lawmman Best Performing District Award Siaha district-in a dawng thei chu a lawm thu a sawi a, "CDPO leh a staff-te thawhhona leh an thawhrimna rah a ni," a ti a, ṭan la zual sauh sauh turin thawktute a chah.

Siaha district bawrhsap VL Hruaizela Khiangte pawhin thu sawiin, Mizoram puma pakhatna nih chu thil awlsam a nih loh thu a sawi a; department hrang hrangte chu hmalakna ṭha nei tura theihtawp chhuah turin a fuih a ni.