Siaha district-ah vawk lak luh khap

Siaha district bawrhsap VL Hruaizela Khiangte chuan hriattirna chhuahin, Siaha khawpui veng hrang hranga vawk thite chu African Swine Fever (ASF) vanga thi a ni tih finfiah a nih avangin Siaha khawpui chu ASF lênna hmun, infected area-ah puan a nih thu a tarlang a, vawk khuahkhirhna thupek a tichhuak.

Siaha Bawrhsap chuan, Diseases Investigation Labo-ratory, Aizawl leh NERDDL, Guwahati, Assam-a vawk thite sample endikna aṭangin ASF vanga thi a ni tih finfiah a nih thu a tarlang a, "Siaha khawpui hi infected area-ah puan a ni. Siahaah vawk thi dinhmunin ziaawm lam pan mah se, a dam/hri kai lo tam tak a la awm avangin fimkhur a ngai a, hri lêng thawh hnihna a thlen loh nan leh hri laka vawk dangte a him theih nan khuahkhirhna thupek tihchhuah chhunzawm a ni," a ti.

Bawrhsap hian Siaha district chhungah district pawn lam aṭangin vawk, vawksa leh vawksa aṭanga ei tur siamte lak luh khap a nih tih a puang a; thupek bawhchhiate chu Bharatiya Nyaya Sanhita, 2023 hmangin hrem theih an nih thu a tarlang bawk.

VAWK KHUAHKHIRHNA
* Thuleh awm hma chuan Siasi khua aṭangin khaw dangah vawk leh vawksa hralh/thawn chhuah khap a ni.
* Siaha khaw chhungah vawk lak luh a nih dawnin khua aṭanga km. 2-a hlaah vawk chu ASF laka a him leh him loh ASF Rapid Test Kit hmangin veterinarian-te'n an endik zel ang. Test kit man leh veterinarian-te veivahna senso ran neitute tum tur a ni.
* Hri laka himte chauh Siaha khaw chhungah lak luh phal a ni.
* Siaha khaw chhungah vawk talhtute'n vawk hrisel ṭha chauh an talh tur a ni a; Vety officer aṭangin soundness certificate an nei ngei tur a ni.
* Vawk damlo talh khap a ni a, vawk damlo chu dah hran vat tur.
* Vawk thi leh suat (culled) tur neite chu AH&Vety department-ah inhriattir ngei tur.