Ruihhlo ngaite tan camping buatsaih dawn

Serchhip district bawrhsap Paul L Khuma hoin nimin khan ruihhlo ngaite pual camping buatsaih dan tur rel a ni a; camping hi January, 2026-ah neih tura ruahman niin, a hun leh hmun tur chiang zawka rel tur leh ṭul dangte bawhzui turin additional DC Lalrinzuala kaihhruai Organising Committee an din.

Paul L Khuma chuan, Nasha Mukt Bharat Abhiyan Drug Free India hnuaiah ruihhlo do dan tur ruahmanna thla ruk chhung atana action plan an buatsaih dan a sawi a; he action plan-ah hian an ngaih pawimawh ber chu ruihhlo ngaiten an sim theihna tura gospel camping neih dan tur ruahman a nih thu sawiin, "Kohhran, tlawmngai pawl leh office tinah an ngaihdante kan zawt kual tawh a, a tam berin camping neih ngei ṭha an tih avangin vawiinah hian camping chungchang hi rel a ni," a ti.

Ṭhukhawm chuan kohhran pawl hrang hrang te, tlawmngai pawl, mimal ṭhahnemngaite bakah office tinah camping pual hian vehbur khawn an rel a; CMO leh District Medical Superintendent-ten medical lamah ṭanpui an inhuam thu an sawi a, Police department pawhin security mamawh a nih chuan an lo inruat tur thu leh kohhran lam pawhin a ṭul apianga thâ thawh an inhuam thu an sawi bawk.