Assembly Speaker hoin conference-ah tel

India hmarchhak huap Commonwealth Parliamentary Association (CPA) India Region Zone-III Conference vawi 22-na chu Kohima, Nagaland-ah November 9, Pathianni khan neih ṭan a ni a; Mizoram aṭangin Assembly speaker Lalbiakzama, deputy speaker Lalfamkima leh MLA pathum - Dr Lorraine Lalpekliana Chinzah, T Lalhlimpuia leh Jeje Lalpekhlua te an tel.

Conference hi Lok Sabha speaker Om Birla chuan a hawng a; November 13, 2025 thleng neih tur niin, thupui chu 'Policy, Progress and People : Legislatures as Catalyst of Change' tih a ni. Shri Harivansh, Deputy Chairman, Rajya Sabha leh Parliament aṭangin mi pawimawh tak tak an tel a ni.

Nimin khan speaker Lalbiakzama leh adviser to CM Dr Lorraine Lalpekliana Chinzah ten 'Role of Legislatures in achieving Vikshit Bharat, 2047' tih thupui hmanga plenary session neihnaah thu an sawi a; vawiin hian 'Climate Change - In the light of recent cloudburst and landslides in some North East Region' tih thupui sawiho a ni ang.